Vann pris for andre år på rad

Marknadsavdelinga i Hordaland Folkeblad, HF Reklame, vart laurdag kveld heidra med Landslaget for lokalaviser (LLA) sin marknadspris.

— Hordaland Folkeblad er ei lita lokalavis med nøkterne ressursar. Samstundes er Hordaland Folkeblad sitt marknadsarbeid i ein eigen toppdivisjon, sa Hilde Dypaune, som delte ut prisen på vegner av juryen.

Prisen vart delt ut på landsmøtet til LLA på Hotel Scandic Parken i Ålesund, der HF deltok med fem medarbeidarar i helga. I alt var om lag 250 tilsette i norske lokalaviser med på samlinga.

Måtte gruvla litt

Marknadsgjengen, som består av grafisk designar Kristina Sofie Kvåle, annonsekonsulent Hilde Saxsæter og dagleg leiar Kjellaug Camilla Skaar Ljones, var ikkje budd på å vinna. Dei kommersielle kvinnene var, om dei skal vera heilt ærlege, ikkje heilt sikre på om dei skulle senda inn eit bidrag i heile teke dette året.

— Me snakka saman om me skulle senda inn noko, men me følte me ikkje hadde gjort så mykje i år. Men då eg gjekk og la meg om kvelden, kom eg likevel på ein del ting me hadde gjort, fortel dagleg leiar Kjellaug Camilla Skaar Ljones.

Då eitt av prosjekta fyrst kom på blokka, var ballen komen på trill. Kvåle sette til slutt saman ein presentasjon, og resultatet vart 60 sider med arbeid og prosjekt frå året som har gått.

I grunngjevinga til juryen står det at medarbeidarane i avisa er svært kreative, dyktige – og ikkje minst: Dei forstår veldig godt marknaden og kundane sine behov. Alle i juryen har lyst til å søkja om jobb i lokalavisa!

Lettlært kvinne

— Me jobbar meir og meir som eit reklamebyrå, seier Kvåle.

Og det er litt av målet, fortel Ljones. Ho seier at HF Reklame ynskjer å kunna laga noko for alle, og tilby marknadsarbeid også utanom papiravisa.

— Og når me har nye idear, spør eg gjerne Kristina: Er dette noko me kan gjera? Ofte svarar ho at ho ikkje kan det, men at det kan ho læra seg på Youtube, seier Ljones.

Med i kampen

Årets lokalavis vart Fjordenes Tidende, og Hallingdølen stakk av med prisen for både årets lokalavisfoto, årets lokalavisside og årets journalistpris. Sistnemnde vann også avisa Hordaland. Juryen klarte nemleg ikkje å kåra berre éin vinnar. Prisen årets digitale satsing gjekk til avisa Frostingen.

HF var med i kampen om fleire av prisane. Ein serie avissider knytte til det nasjonale folkevandringsprosjektet i fjor vår var ein av fem nominerte kandidatar i finalen i tevlinga årets avisside. Eit bilete frå leiteaksjonen etter ulukka i Tokagjelet i oktober var eit av ti bilete i finalen i tevlinga årets lokalavisfoto.