Sydenstemning i Kvam

Piknikteppe, strandstolar og badedyr har vore å sjå på strendene i Øystese og Norheimsund dei siste dagane. Både lokale og tilreisande vart freista til å bada, nyta sola eller kjøpa is.

I Øystese var det roleg då bladfyken var innom laurdag. På stranda sat Jannike Johansen frå Knarvik og familien hennar. Dei hadde sett opp bord og stolar, og eit lite strandtelt til sonen Amir. Familien reiser ofte på dagstur til Øystese om sommaren.

Johansen seier at det er roleg på stranda i Øystese. Ein kan sitja og nyta det fine landskapet. Det er enkelt å ta ting med seg hit, seier ho. 

– Det er minst like fint her som i Syden, seier Johansen.

Vêret var akkurat passe. Litt vind kom godt med, slik at det ikkje blei altfor varmt.

Mannen hennar bada i fjorden. Sonen ville bada, men han vart litt redd for bølgjene. Grilling, leiking og bading stod på programmet.

Bryllaup og bestemorbesøk

I parken sit to familiar på plenen. Sindre Ask Soldal er frå Kvam, men bur på Sørlandet.

Eiril Ask Soldal fortel at dei kom til bygda for å vera gjester i eit bryllaup og for å vitja bestemora.

Borna fortel at dei har bada.

– Det var ikkje så kaldt. Det var varmare i vatnet i dag enn i går, seier Anna Thune Soldal.

Eiril fortel at det var store bølgjer i vatnet.

– Det var nesten som danmarksbølgjer. I Danmark har dei store bølgjer, seier ho.

Marie Thune Soldal fortel at familien hennar skal på ferie til Barcelona i Spania og til Frankrike. Der er det varmt, og det gler ho seg til.

Sel mest is

I ei vogn ved stranda står Abdulaziz Mohamed Saalah. Han jobbar for Øvreviken Pizzeria, og sel is og slush for andre året på rad.

– Me sel betre på varme dagar. Me selde mykje meir i går enn i dag, seier Abdulaziz.

Han vonar det vert like bra vêr og sal som i fjor. Frå vogna byr han på forskjellige smakar av italiensk is, slush, sorbé og kaffi.

– Den mest populære isen er vanilje, seier Abdulaziz, som sjølv har mest sans for jordbæris.

Førre fredag hadde isvogna ope for fyrste gong denne sommaren. Allereie fyrste dagen vart sorbeen utseld.

Vogna er open på dagar med sol, når det er mange på stranda, ifylgje Abdulaziz. Han fortel at salet varierer. Flest familiar, både lokale og turistar, er innom, seier han. 

Ferie i Norheimsund

Også i Norheimsund nytta campingturistar, barnefamiliar og ungdomar stranda.

Ein familie på campingtur frå Tyskland hadde slått seg ned ved eit bord i parken. At dei stoppa her, var tilfeldig. Parkeringsplassen bak parken var ein fin stad å parkera campingbilen, seier Oliver Schmitz Filip.

Kona Karolina fortel at familien vitja Norheimsund for å sjå Steinsdalsfossen. Neste stopp er Sogndal. På reisa har dei med seg to born. 

– Vêret er bra til Noreg å vera, seier Oliver. 

Før reisa såg familien på vêrmeldinga at det skulle regna og vera rundt 12 grader. Vêret har snudd og vart ei positiv overrasking. Karolina seier at ho håpar det vert slik på resten av turen.

Hoppa i vatnet

Ein venegjeng mora seg på brygga ved stranda i Norheimsund. Liam Kongestøl Mongstad tok sats og hoppa ut i vatnet. Guten skalv då han kom opp på brygga igjen. 

Han fortel at han kjem frå Norheimsund, men bur i Kenya med foreldra. I juni kom familien tilbake til bygda for å feriera. Liam hadde ikkje vore på stranda før denne helga. Laurdag testa han badetemperaturen med venene Aleksander Bredesen frå Vikøy og Oddne Træbakken frå Steinsdalen. Vatnet var kaldare laurdag enn fredag, seier Liam. 

Han ser fram til å bada meir i det fine vêret. 

Mia Canete frå Bergen var på brygga med familien som er på besøk frå Hongkong. Ho fortel at dei bur på ei hytte på Oddland Camping i Vikøy. Dei kjem til Hardangerfjorden fordi dei synest det er fint her. Når dei kjem, plar dei padla på fjorden, seier Canete. 

Raine og Jacob Bucoy er sysken. Raine vitja Kvam for to år sidan. Jacob var i Noreg for fyrste gong. 

Han synest det er fint, men veldig kaldt. Canete meiner at det ikkje er så kaldt i vatnet, men vinden gjer det kaldt.