Forskar: – Fjerning av formuesskatten får liten effekt
Formuesskatten har segla opp som eitt av dei mest diskuterte temaa i denne valkampen. Å fjerne han vil ha liten effekt utover at dei rikaste får større formuar, ifølgje økonomiforskar.
– Fleire i denne valkampen prøver å fortelje at fjerning av formuesskatten kjem til å ha positive effektar for langt fleire enn dei rikaste. Eg er likevel usikker på i kva grad dei greier å overtyde folk om den bodskapen, seier økonom og postdoktor ved Universitetet i Oslo, Martin Blomhoff Holm, til Nynorsk pressekontor.
Nyleg deltok han i ein panelsamtale ved Universitetet i Oslo om løfter og løgner i valkampen. Der vart mellom anna argument for og mot formuesskatten diskutert.
Annonse
Trur ikkje på store ringverknader
Nabolanda våre Sverige og Danmark fjerna formuesskatten i høvesvis 2007 og 1997 – difor er det naturleg å sjå dit når ein skal undersøkje kva følgjer dette vil få. Holm peikar på at ei fjerning truleg vil ha avgrensa effektar.
– Utover at dei rike får større formuar, kan ein kanskje rekne med at vi får ei lita endring i talet på investeringar. Elles vil det nok ha liten betydning, meiner han.
Om det skulle bli eit regjeringsskifte og dei borgarlege kjem til makta er det stort sannsyn for at formuesskatten blir fjerna eller kraftig redusert. Dersom det skjer trur Holm at det skal bli utfordrande for formuesskatt-tilhengarane å få han innført på nytt ved seinare høve.
Annonse
– Det er fare for at han då blir borte for alltid – og det kan sjølvsagt vere ønskeleg blant enkelte parti. Men eg trur då at venstresida vil ha eit behov for å få tilbake ein annan skatt som for eksempel arveavgifta.
Vil ha skatteforlik
Sjølv har ikkje økonomiforskaren tru på at den beste måten å drive skattepolitikk på er å innføre og fjerne skattar basert på kven som sit med makta i regjeringskontora.
– Vi har hatt breie skatteforlik i Noreg tidlegare og det håpar eg vi kan få igjen.
Finansminister Jens Stoltenberg har vore klar på at dette er noko han ønskjer. Han har òg opna opp for at reduksjon i formuesskatten kan vere ein del av eit slikt forlik.
– Som ein del av eit breitt skatteforlik opnar vi for å sjå på alle skattar, også formuesskatten. Men det må vere ein del av ein heilskap, sa Stoltenberg til TV 2 i juni.
Annonse
Martin Blomhoff Holm trur valresultatet kjem til å få stor innverknad på om det kjem på plass ei semje om skatt eller ikkje.
– Viss venstresida vinn trur eg det blir sett i gang eit slikt arbeid. Viss høgresida vinn trur eg ikkje det blir noko av. Dei har ikkje det same behovet for den typen forlik, seier han.
(©NPK)
