Ny kraftavtale for sju år

Avtalen skal sikra føreseieleg og konkurransedyktig krafttilgang til hjørnesteinsverksemda i Kvam. Han omfattar levering av totalt 1534 gigawattimar, opplyser Statkraft i ei pressemelding.

I meldinga skriv selskapa at avtalen støttar industriell aktivitet, lokal verdiskaping og berekraftig produksjon i verksemda med om lag 150 tilsette.

Smelteverket er ein av dei største leverandørane i verda av støypelegeringar. Den årlege produksjonskapasiteten er 60 000 tonn. Produkta vert i hovudsak selde til EU og Asia, og vert nytta i mellom anna bilindustri, bygg og anlegg, fornybar energi og forsvar.

– Langsiktige og konkurransedyktige kraftavtalar er avgjerande for å oppretthalda industriell produksjon og arbeidsplassar i Noreg. Avtalen styrkjer konkurranseevna til Bjølvefossen og illustrerer kor tett samanvoven norsk kraft og industriutvikling er, seier Inge Grubben-Strømnes, konserndirektør for Foundry Alloys i Elkem, i presseskrivet.

Han seier avtalen gjer det mogleg for Elkem å halda fram med leveransar av strategiske materiale til europeisk industri, og samstundes bidra til forsyningstryggleiken i EU.

– Det er veldig gledeleg å inngå endå ein langsiktig kraftavtale med ei viktig industriverksemd i Noreg. Lange kontraktar med konkurransedyktige prisar bidreg til lokale arbeidsplassar og verdiskaping i ei tid prega av mykje uvisse og store svingingar, seier Hallvard Granheim, konserndirektør for Markets i Statkraft.