Brann i jondalshus

Like over klokka 20 fredag kveld fekk politiet melding om brann i ein einebustad i Jondal sentrum. 

Klokka 20.21 opplyste politiet at brannvesenet var på staden og at bebuarar var evakuerte. Politiet var då på veg.

– Det skal ha brunne på eit kjøken under matlaging. Brannen er sløkt, skreiv operasjonsleiar Steinar Hausvik i Vest politidistrikt.

Klokka 21.06 melde politiet at også politiet var på plass. Klokka 21.40 var siste politinytt at det vert oppretta sak.

Måndag seier politioverbetjent Vidar Litlekalsøy ved Hardanger politistasjon at det mest sannsynleg var ei gryte med smolt som brann. Ni personar vart evakuerte frå huset. Ein person vart frakta til legevakta for sjekk, men det framstår som mindre skadar. Då politiet kom til legevakta for å snakka med vedkomande, var personen reist derifrå.