Færre husdyr erstatta etter rovvilttap
Tala frå erstatningsoppgjeret for 2024–2025 viser ein moderat nedgang i tap av tamrein og sau til freda rovvilt samanlikna med tidlegare år.
Dyreeigarar har krav på full erstatning når rovvilt som gaupe, jerv, bjørn, ulv eller kongeørn er årsaka til tap av dyr.
Det vart søkt erstatning for om lag 74.000 tamrein, medan rundt 19.000 dyr vart godkjende som rovvilttap, ned frå nær 21.000 året før. Nedgangen heng særleg saman med færre tap til jerv og kongeørn. Samstundes vart det utbetalt over 108 millionar kroner i erstatning. For sau og lam vart knapt 15.000 dyr erstatta etter beitesesongen, mot om lag 17.000 året før, skriv Miljødirektoratet i ei pressemelding.
Annonse
Hilde Singsaas er direktør i direktoratet. Ho peikar på at mange dyr aldri blir funne att i utmarka, noko som gjer dokumentasjon vanskeleg. Berre ein liten del av reinsdyra det vart søkt erstatning for, vart påvist tekne av rovvilt gjennom kadaverundersøkingar.
– Det er ei utfordring for alle involverte at det er vanskeleg å dokumentere tapsårsak, seier Singsaas i pressemeldinga.
Reindrifta vart dessutan råka av ei omfattande beitekrise vinteren 2024–2025, då islagde beite gjorde mattilgangen dårleg. Styresmaktene held fram arbeidet med tiltak for å redusere rovviltskadar, mellom anna ekstraordinært uttak av jerv i område med store tap.
(©NPK)
