– Usmakeleg og tankelaust
Kva desken i HF har hatt i tanke å målbera med sitt framsidebilete i fredagsutgåva førre veke, er vanskeleg å skjøna. Her vert ei visseleg inkje-anande og smilande jente plassert framfor altertavla av den oppstadne Kristus og introdusert med «Djevel: …» – og med fullt namn.
Eg kjenner korkje til jenta eller arrangementet utover det HF sitt oppslag ber bod om. Men eg finn det beint fram usmakeleg at HF utnyttar ei heilt uskuldig jente som statist til å skora eit billeg – og sikkert morosamt (?) – poeng med ein djevel ved alteret i kyrkja; dess meir sidan det i reportasjen vert peika på at «Halloween er eit kommersielt fenomen ... (med) ... allslags grusomme kostyme». Det er derfor slett ikkje sikkert borna er seg medvitne kva kostymet dei ber representerer; jenta – eller hennar foreldre – hadde nok ikkje i tanke at ho skulle verta framstilt som «Djevel:» i biletteksten. Det må HF ta ansvar for og samstundes grunna på kvifor «Ver Varsam plakaten» – som pressa er forplikta på – tilrår varsemd med barn og biletbruk. Ein spør seg om slik biletbruk er førelagt barnet og foreldre til godkjenning.
Når HF vel eit slikt framsidebilete og dermed slik vinkling, får eit prisverdig tiltak for å gje borna eit godt alternativ bort frå det massivt amerikansk kommersielle, eit heilt rangsnudd fokus.
I ein hektisk pressekvardag med deadline like om hjørna går ting fort for seg og missteg kan førekoma. Såleis hadde eg vona HF sjølv ville sjå dette som eit feilsteg og sagt seg leie for det i den neste utgåva av avisa. Når slik orsaking ikkje er sett, vonar eg – som uhilda lesar – HF vil retta dette opp for å yta både ho som er avbilda og sjølve arrangementet rettferd.
Kjell Strømme, Norheimsund
Fleire reagerer på biletbruken:
