Venskapleg moro i kyrkja

Underteikna høyrer til dei lesarane av HF som på tomannshand mang ein gong har takka redaktøren for god journalistikk og vilje til å stå på til bate for lesarane.

I dag har eg trong til å kommentera vinkling på stoff i HF nr. 83 fredag 2. november. HF skal ha takk for å dekka den populære tilskipinga Hallovenn i Norheimsund kyrkje 31. oktober med fint biletstoff og levande skildring over to sider inne i avisa, og for introduksjonen «Venskapleg moro i kyrkja» på framsida.

På nettsida til HF finn eg framsidebiletet av den symbolfylte altertavla, festdeltakar og tekst under KULTUR. Men same biletet med ein noko annan tekst i papiravisa utløyser tanken: MANGEL PÅ KULTUR frå HF si side akkurat her. Eller – kan det vera at det gamle uttrykket LITE TENKT er det rette?

Olaug Dyrkorn