Djevelen finst

H.F. konstaterer i eit 4-spalters oppslag på l. side 2. november at dei har sett ein djevel (verkeleg eit oppslag av ålmenn interesse), og med fotografisk dokumentasjon. (No må ikkje søte Melita, som har vorte lokka til den groteske senen med djevleattributtar, tru at det er ho som er smådjevel. Det var vel kanskje ein tankelaus fotograf. Men, for å halda oss i «Hallovenn-språk«: ---r. Spørsmålet vert då: Kor i alle krokar og krær kan smådjevelen ha gøymt seg før H.F. fann han? Jau. Sjølvsagt bak altaret. Det er så stort og tett at det er plass for mange smådjevlar, og dei kosar seg med at alteret er så stort at det hindrar mange, mange å sjå heile tavla som er ei «forteljing om synd og nåde, forma i betong og mosaikk», som H.F. uttrykte det ved kyrkjevigsla l989.

Avisoppslaget skuffar nok svært mange som har fått øyro proppa med opplysingar om at korkje djevelen eller helvete finst, noko som til og med biskopar har sagt.

Og det har vore ei god sovepute for mange, for fleirtalet har alltid «rett».

Men so lurer eg på: Kvar kan all djevelskapen i verda koma av, ikkje frå mennesket, for det er «godt i grunnen». Politikarane som lagar lover som får fleirtal? T.d. når ei gravid kvinne har tvillingar, og det ikkje passar i situasjonen, kan ho få drepe den eine. Har du høyrt noko so djevelsk? Det er bevis nok.

Men om djevelen og helvete ikkje eksisterer, då eksisterer vel ikkje Gud heller? Nei, det segjer mange, jamvel om dei lever i ei fantastisk verd som Gud har skapt.

Og han er svært glad i det som han har skapt, mennesket mest, så glad i oss at han sende Jesus.

Dei to, Gud og Satan, er i krig, og me er midt oppi den. Men det er noko smådjevlane ikkje veit. Det er at Satan alt har tapt, dersom den søte jenta bak alteret (ho som ikkje er djevel), ville ha snudd seg, ville ho ha sett at sjefen, stordjevelen (satan) alt er overvunnen, med knust hovud. Det hende då Jesus leid døden på krossen. Då tok han vår syndeskuld. På tavla ser ein at krossen vert boren av eit lam, symbolet på Jesus som offerlam. Det vart «slakta» og blodet rann som eit spyd ned på slangen som er djevelen.

Dette er det heile kristendomen handlar om, at Jesus kom til jord for å berge oss og forsone oss med Gud og gi oss evig liv. Det er eigentleg heilt fantastisk, og det beste som finst, er å ha Jesus i hjarta.

Takk Melita, for at du stilte opp. Og takk til dei mange som stilte opp og gav borna ei kjekk «Hallo-venn-feiring», noko som H.F. nok har forvrengt i framstillinga.

Audun Storaas