Reiser tilbake til Nederland

Torgeir Børven frå Øystese skal kjempa om spissplassen i Twente igjen når låneavtalen med Brann går ut laurdag.

Børven sluttar seg til eigarklubben FC Twente igjen rett over nyttår. Til Bergens Tidende (BT) seier Børven at han skal ned dit å trena og kjempa for ein plass.

Det er usikkert om Børven kjem tilbake til Brann, men ikkje heilt umogleg. Brann leiinga har tidlegare opna for å signera Børven på permanent basis, skriv BT.

Kontrakten med Twente varer fram til sommaren 2018.

Etter at Børven kom til Brann i august, har det berre vorte fire kampar og nesten ikkje speletid i favorittposisjonen som spiss. Han angrar likevel ikkje på perioden i Brann.

– Det har vore både bra og dårleg for meg. Det var morosamt å ta medalje, tipp-topp i garderoben og klubben, men mindre speletid enn eg hadde håpa på, seier Børven til BT.

I Twente må Børven kjempa mot tyrkiske Enes Ünal, som er førstevalet, om spissplassen.