Geir Flotve spjåka seg ut som Elvis sist Tour des Fjords prega Kvam. No kjem sykkelsirkuset innom igjen. Arkivfoto

Får målgang i sykkelritt

Publisert: 27.02.2017 23:01 Sist oppdatert: 28.02.2017 01:10

Norheimsund får målgangen på andre etappe av sykkelrittet Tour des Fjords i mai. Kvam herad har ikkje garantert økonomisk for å få målgangen, seier ordførar Jostein Ljones (Sp).

Rittet startar i år i Sogn og Fjordane med etappen Balestrand–Førde. Vidare går rittet frå Brekke i Gulen til Norheimsund. Denne etappen er på 185 kilometer.

Målgangen i Norheimsund vert 25. mai. Tredje etappe går frå Odda til Haugesund, medan rittet vert avslutta med ein etappe frå Hinna park til Stavanger sentrum 28. mai.

Arrangøren krev å få 250.000 kroner for å ha målgangen i Norheimsund. Ordføraren skriv i ein e-post til HF at han arbeider med private verksemder og Hardanger sykkelklubb for å få finansieringa på plass. Det står att litt før alle pengane er i boks.

Sist Kvam hadde målgang i rittet, var i 2015. Då løyvde kommunen sjølv dei 250.000 kronene.