Sjukdom stoppa ferja
Det var sjukdom som stoppa ferjesambandet Jondal–Tørvikbygd måndag i førre veke.
Ifylgje ei melding frå ferjeselskapet same dagen låg «operasjonelle årsaker» bak driftsstansen.
– Det var ein mannskapssituasjon. Det var sjukdom, og me bruka litt tid på å få på plass ein person, seier Tor Kristoffersen, regionleiar i Fjord1, til HF 7. mai.
Artikkelen held fram under annonsen.
Den siste avgangen måndag 29. april var frå Tørvikbygd klokka 20.50. Dagen etter byrja ferja å gå fyrst klokka 08.20 frå Jondal. Passasjerbåten «Pilagutt» vart sett inn i sambandet for å bøta på problema.
HF skreiv i mars om ei uviss framtid for ferjeavgangar. Sjøfartsdirektoratet har endra praksis knytt til regelverket for kviletid. Om mannskapet skal halda fram med døgnskift, slik ordninga er i dag, må kanskje turar tidleg eller seint i ruta takast vekk for at drifta skal vera i tråd med det nye regelverket.
Sjøfartsdirektoratet vil ikkje gje Fjord1 dispensasjon. No ligg ein klage til handsaming hjå Nærings- og Fiskeridirektoratet. Fjord1 ventar framleis på svar, opplyser regionleiaren. Svaret vil truleg koma i sommar, seier han. Fram til då vil mannskapet halda fram som før.
