Ullensvang er framleis «rein»

75 er testa for koronasmitte i Ullensvang. 66 negative svar er mottekne, og ni testar ventar kommunen enno på svar på.

Det melder Ullensvang kommune i ei pressemelding tysdag kveld.

Kommunen ventar enno på tinga forsyningar av smittevernutstyr, og arbeider med opplæring av såkalla first responder-personell.

Kommunen har oppretta Bygdarbøen smitteklinikk og luftvegslegevakt i Odda, der testing og poliklinisk behandling av smitta skal skje. På Bokko sjukeheim i Odda ligg hovudavdelinga for smitta, med personell skilt frå resten av institusjonen. Sjukeheimen har ei skjerma avdeling for åtte koronapasientar. Dessutan vert andre sjukeheimar lagde til rette for å handtera smitta, og det vert vurdert i kvart tilfelle kvar pasienten bør behandlast.

Kommunen oppmodar innbyggjarane om å utsetja legebesøk om det er mogeleg, ettersom kapasiteten på legekontora er redusert. Fastlegane vil vurdera fleire pasientar over telefon, noko som no utløyser eigendel.

Kommunen opplyser elles at han har hatt ei rekkje møte med næringsaktørar- og organisasjonar for å drøfta avbøtande tiltak som kan halda hjula i gang. Kommunen arbeider med innspel til fylkeskommunen og staten om jobbar som kan utførast i distriktet og bidra til sysselsetjing og verdiskaping i ei vanskeleg tid.

– Stå på vidare, denne krisa skal me løysa saman! skriv ordførar Roald Aga Haug i pressemeldinga.