Nei til frislepp på fjorden

Det bør ikkje verta lov med friare bruk av vasskuter i Kvam, meiner rådmannen. Heradsstyrepolitikarane skal seia kva dei meiner 21. mars, men fyrst skal formannskapet drøfta forskrifta om bruk av den vassgåande doningen onsdag.

– Fjorden er viktig for natur, dyreliv, miljø, friluftsliv, opplevingar og næringsutvikling. Skuterbruk vil påverka alle desse interessene, konkluderer rådmannen i si vurdering.

Dersom dei vasskuterfrie sonene vert avvikla, vert konsekvensane truleg høg fart nær land, auka støy og fleire konfliktar, ottast han. I dag er det lovleg å bruka vasscooter minst 400 meter frå land på fjorden, og 500 meter frå land i ferskvatn når innsjøen er over to kvadratkilometer stor. Det er lov å passera det skuterfrie farvatnet om farten er under fem knop.