Vurderer strengare tiltak – arrangement kan måtta avlysast

Kvam herad vil fredag vurdera å innføra strengare tiltak.

I lys av smittesituasjonen i Bergen vurderer Kvam herad å innføra strengare tiltak for å hindra spreiing av koronaviruset, skriv heradet på nettsida si fredag.

Kommunane som tilhøyrer same bu- og arbeidsmarknadsregion som Bergen, har varsla at dei vil gå saman om ein sams tiltakspakke for å bremsa smitteutviklinga. Det inneber følgande punkt:

• Maksimalt fem personar kan samlast i ein privat heim, med unntak av familiar som er fleire enn fem, og born som er i same kohort.

• Alle som kan ha heimekontor får påbod om heimekontor.

• Høgskule og universitet skal ha digital undervising.

• «Raudt nivå» på vidaregåande skular – det inneber ikkje stenging, men strenge tiltak for å hindra nærkontakt.

• Breiddeidrett og andre aktivitetar – til dømes korps – for vaksne over 20 år vert stengde.

Andre tiltak kan verta aktuelle.

Sjølv om Kvam herad tilhøyrer ein annan bu- og arbeidsmarknadsregion, vil ein også her vurdera tiltaka. Heradet har vore i møte med Bergen og omegnskommunane og følger utviklinga. I løpet av fredag vil ein avgjera om ein skal innføra strengare tiltak også her.

Heradet er også i dialog med Voss herad om smittesituasjonen. Der vart det fredag påvist nok eit smittetilfelle, noko som inneber at kommunen har hatt seks smittetilfelle i løpet av dei to siste vekene.

Det er for tida ingen med koronasmitte innlagde på Voss sjukehus.

Klokka 12 skal byrådet i Bergen presentera nye reglar.

Kvam herad har drive smittesporing etter at ein person fekk påvist smitte i går. Det er ikkje fleire nærkontaktar i Kvam.