Vogntogtrøbbel på begge sider av Kvamskogen

Eit vogntog har hamna i grøfta i Tokagjelet etter eit møte med eit anna vogntog. Klokka 10:00 melde Vest politidistrikt på Twitter at politiet var på staden, og at Falck var varsla. Vogntoget trong hjelp til å komma opp av grøfta. Det er manuell dirigering på staden.

I 9-tida i dag skal fire vogntog ha stansa på vegen mellom Samnanger og Kvamskogen på grunn av dårleg føre. Brøytemannskap var i området. Klokka 10:15 melde Vest politidistrikt på Twitter at politiet enno ikkje hadde komme til staden på grunn av manuell dirigering i Tokagjelet. Politiet har ikkje noko informasjon om at vegen er stengd.

12:12 melde politiet at trafikken gjekk normalt i begge retningar på Samnanger-sida, etter at det siste vogntoget var blitt slept ut av vegen av ein annan lastebil.

14:32 var køyretøyet i Tokagjelet tilbake på vegen etter at ein tungbilbergar hadde komme frå Voss. Vegen skal no vera opna.