– Anlegget er fjerna
Setjestatsforvaltaren sette foten ned. No har Lingalaks AS fjerna anlegget ved Horggjona i Tørvikbygd.
Det opplyser teknisk sjef i verksemda, Ingebrigt Ølmheim, i ein e-post til Kvam herad og Fiskeridirektoratet 6. mars. Ølmheim skriv at anker og lodd er fjerna, og boltar kappa vekk. Lingalaks har òg saumfare botnen rundt ankerpunkta, som låg om lag 600 meter under vassoverflata. Det vart ikkje funne anna fortøyingsutstyr enn det fortøyingsplanen tilseier, skriv den tekniske sjefen.
Ein vedlagd arbeidsrapport frå leverandøren Dypvest syner at arbeidet med fjerning av boltar og kjettingar vart utført i byrjinga av desember. I rapporten skriv verksemda at alle boltane er brente av så nær fjell som mogleg, og at tilhøyrande komponentar og ein del tauverk er tekne opp frå sjøen.
Artikkelen held fram under annonsen.
Lokaliteten, som fungerte som eit slags lager for diverse oppdrettsutstyr, vart fjerna etter at setjestatsforvaltaren i Rogaland sa seg samd med kollegaen i nabofylket i at lageret måtte opphøyra. Det vil seia at setjestatsforvaltaren oppheva vedtaket i Kvam herad om å gje Lingalaks dispensasjon.
