H og Sp motsette seg i ettermiddag å handsama eit framlegg til fråsegn om saka frå Terje Kollbotn (Raudt). Lajla-Margrethe Lindskog-Lund (Sp) meiner tidspunktet for å ta opp saka er feil, all den tid anbodsrunden er gjennomført for lengst og Fjord1 skal overta drifta av sambandet om få veker. Det er tid- og kostnadskrevjande å endra anbod, påpeika ho. Jondølingen fryktar dessutan at saka kan slå negativt ut i kampen for to ferjer om sommaren. Erlend Nævdal Bolstad (H) sa at han er trygg på at tryggleiken er godt vareteken av ein seriøs aktør. Han etterlyste dessutan fakta om saka utover det Kollbotn serverte.
Trekte framlegget
Som følgje av motstanden trekte Kollbotn framlegget for å unngå eit delt kommunestyre. Han minte om at den same saka vert drøfta av fylkestinget i ettermiddag, etter iniativ frå hans eige parti. Såleis har fylkestinget høve til å gjera noko med saka og endra ein kontrakt der han meiner prisen er pressa til dumpingnivå. Han vedgjekk at ein er seint ute, men meiner det er mogeleg å få gjennomslag om ein står samla og kjempar. – Sp og H får reisa tilbake til Jondal og forklara ferjemannskapet at dei ikkje lyfta ein finger i saka, sa han. – Det er ikkje slik at Sp vil ha dårlegare bemanning, tryggleik og sørvis, men tidspunktet er feil. Ein får ikkje gjennomslag ved å koma i ettertid, sa Lindskog-Lund.
Artikkelen held fram under annonsen.
Utgreier sak
Fylkestinget vedtok som del av budsjettet i går samrøystes å tinga ei utgreiing av kostnaden med ekstra ferjeavgangar om sommaren. Finansieringa vil dei folkevalde koma tilbake til i 1. tertialrapport. Fylkesrådmannen sende nyleg ut eit notat der kostnaden med ei ekstra ferje i fire månader er stipulert til fire millionar kroner.
