Arne Sandven (H) meiner dei folkevalde og ålmenta bør få sakspapira tidlegare, og ber rådmann Anita Hesthamar og Torgeir Næss (Ap, t.h.) om å gjera greie for dagens praksis.
Sigbjørn Linga
Vil ha sakspapira i Kvam tidlegare
Nærare bestemt kom sakspapira i ein e-post til politikarane klokka 22.50 onsdag kveld. Torsdag var heilagdag og fredag planleggingsdag, før ei helg var i vente, påpeikar Sandven i ein e-post til ordføraren og rådmannen.
– Dette gjev lokalpolitikarane svært avgrensa tid til å førebu seg dersom dei samstundes skal tilbringa langhelga med familiane sine. Det er allereie svært utfordrande å få innbyggjarar midt i småbarnslivet til å stilla til val, på grunn av avgrensa med tid. For innbyggjarane reduserer sein levering av sakspapir høvet til å verta informerte gjennom lokalavisa før politiske avgjerder vert tekne. Det er ein gjengangar at sakspapira er seine, og dette medfører dårlegare demokratiske prosessar enn det me kunne ha hatt, skriv Sandven.
Han vil vita kva ordføraren meiner er tilstrekkeleg med tid til å setja seg godt inn i sakene før møta, og korleis ordføraren og rådmannen saman kan sikra at sakspapira vert sende ut i forsvarleg tid.