Ynskjer tips etter brann i Norheimsund

Politiet ynskjer tips etter brannen i Norheimsund torsdag. Det seier overbetjent Anne-Siri Tysseland i Kvam, Samnanger og Tysnes politistasjonsdistrikt til HF måndag.

Ho fortel at det er for tidleg å seia noko om brannårsaka. Ein av fleire hypotesar er at brannen er påsett, fortel ho.

– Me er interesserte i å vita om nokon har lagt merke til personar eller bilar i området der konteinarane står eller i nærområdet i tidsrommet 19.15–19.30, seier Tysseland.

Politiet etterforskar brannen og var på staden også fredag. Kvar brannen starta, kan ho heller ikkje seia noko om, men det vart meldt om røyk frå innsida av brakka. 

Politiet fekk melding om hendinga klokka 19.30, melde Vest politidistrikt i Politiloggen.

Sjå video:

– Me har fått melding om at det skal brenna i det som kan vera ei arbeidsbrakke ved Spar, sa vaktleiar ved 110-sentralen, Stian Kvam.

Ein tilsett i GBS Entreprenør AS var i nærleiken då brannen vart oppdaga. Han skulle ta imot noko og såg at det var fyr i brakka. 

Innsatsleiar i Kvam brann og redning, Svein Valland Laupsa, fortel at brannvesenet rykte ut og byrja å  sløkkja. Etter eit kvarter var brannen under kontroll.

– Det var mykje og forholdsvis farleg røyk å pusta inn, og det var veldig mykje folk her. Så me var uroa for det, seier Laupsa.

Brannvesenet bad folk om å trekkja vekk.

Effekten av arbeidet var god, og det var ikkje fare for at brannen skulle spreia seg, seier Kvam. Om lag klokka 20 var brannvesenet i gang med å kjøla ned brakka for å hindra at brannen skulle blussa opp igjen.

Tysseland seier at det ikkje var personar i brakka. Ingen vart skadd. 

Sjå fleire bilete her: