Vil bruka 28 millionar på nytt velkomstsenter

Det nye velkomstsenteret kan reisa seg ved sommarskisenteret på Folgefonna allereie i år.

Dagens publikumslokale er ikkje tenlege og er eit monaleg hinder for vekst. Vona er å erstatta dei gamle bygga ved skitrekket med eit splitter nytt velkomstsenter med ei rekkje funksjonar.

Senteret er nemleg planlagt med restaurant, salslokale, toalett, garderobar, utstyrslager og informasjonssenter, pluss mogelege lokale i samarbeid med forskingsinstitusjonar.

Det kom frå då dei store planane vart presenterte i kortversjon for kommunestyret i Jondal 13. desember. Arkitekt Lars J. Berge viste og fortalde om skissene han har utarbeidd av senteret.

Ifølgje søknaden er målet med prosjektet mellom anna å auka talet på gjester frå 27.000 til 50.000 på fire år, og å få til ei langsiktig heilårsdrift. Vinterstid er tanken å nytta trakkemaskin, ski og truger.

Stiller opp

I kommunestyremøtet varsla dagleg leiar Andreas Skogseth i Visitfonna AS, som er styreleiar i det nye selskapet, ein søknad til kommunen om stønad til prosjektet. Dei andre finansieringskjeldene er eigenkapital (9 millionar), tilskot (5 millionar) og lån (8 millionar) frå Innovasjon Noreg), og lån frå Sparebanken vest (3 millionar) kroner.

Søknaden om 3 millionar kommunale kroner til prosjektet kom 7. januar. 11 dagar seinare er rådmannen klar til å bla opp 1,7 millionar kroner frå næringsfondet til prosjektet, viser sakspapira som vart offentleggjorde fire dagar før plan- og driftsutvalet skal vurdera saka måndag. Kommunestyret avgjer henne, vel å merka.

Søkjaren er det ferske selskapet Folgefonna velkomstsenter AS, som Visitfonna og Folgefonni breførarlag AS står bak – «personar som vil satsa og skapa noko», skriv sakshandsamar Sigrid B. Handegard i saksutgreiinga.

– Fonna ein berebjelke

Rådmannen viser til at Folgefonna er ein berebjelke i det jondalske reiselivet, og meiner senteret vil gje gjestene ei betre oppleving og høgare kvalitet. Rådmannen støttar seg på talmaterialet i ein ringverknadsanalyse, nyleg omtala i HF, som søkjaren sjølv har fått utarbeidd av Menon Economics.

Vidare er det positivt at aktørane bak tilbode på fonna står saman om eit felles selskap og vil satsa store pengar. Ettersom reiseliv er eit satsingsområde for næringsfondet, ser ikkje rådmannen vanskar med å løyva pengar, men altså ikkje full pott.

Årsaka til avgrensinga er både allereie mottekne og venta søknader om fondsstønad, i all hovudsak frå bønder. Rådmannen trur tiltaket kan realiserast uansett ettersom det vil lengja sesongen og føra til fleire gjester.

Lovar å koma att

Søkjaren har bede om eit årleg driftstilskot på 250.000 kroner til toalettanlegget. Rådmannen meiner det ikkje vil vera i tråd med føringane for næringsfondet å løyva pengar til det.

Han meiner samstundes at det ikkje er unaturleg å drøfta auka driftsstønad, og lovar å koma attende med ei eiga sak som gjeld denne løyvinga.

Eit oversyn som er vedlagt saka, syner at Jondal kan koma til å svi av heile næringsfondet før samanslåinga med Odda og Ullensvang. Rådmannen spår nemleg å bruka 5,6 millionar kroner, like mykje som dagens fond på 4 millionar pluss tilført kapital dei to neste åra, på å støtta diverse tiltak. Dei fleste gjeld tiltak i landbruket, anten driftsbygg eller dyrking.