Vegen er open att
Fleire steinar og eit tre hamna sundag kveld i vegbanen på fylkesveg 79 i Steinstøberget, som ligg mellom Steinstø og Ytre Ålvik.
Publisert
Sist oppdatert
Måndag morgon var ein geolog på skredstaden og gav entreprenør klarsignal for å rydda. Det opplyste trafikkoperatør hjå Vegtrafikksentralen vest, John Andreas Omdal, til HF.
Entreprenøren såg føre seg å ha vegen ferdig rydda og klar til opning om lag klokka 10.30. Litt før klokka 10 melde Bergens Tidende, som siterte sentralen, at vegen var opna.
Annonse
Geolog i Vestland fylkeskommune, Håvard Fiksen, seier til HF at det vesle steinspranget kom frå høgt oppe i fjellet. Steinane laga eit hol i vegbanen og knuste. Det er ikkje naudsynt å ta seg opp i fjellet for å reinska skredløpet, opplyser han.
Fylkesvegen mot vest vart stengd ved Steinstø. Gjermund Dårflot Olsen, rektor ved Ålvik skule, var mellom dei stod i køen då HF var på staden. Han opplyste at elevar og lærarar som til vanleg er på skule og jobb i Øystese, har byrja dagen på Ålvik skule. Elevane vert sende på skulen i Øystese når vegen eventuelt opnar.
Ifylgje trafikkoperatør Tom Erik Englaugstad hjå Vegtrafikksentralen vest skal steinane som fall, ha vege eit par hundre kilo.
Det var trafikantar i området som varsla sentralen om hendinga. Entreprenøren vart tilkalla og vegen vart stengd.
Annonse
Bergens Tidende omtala skredet fyrst.
