Tropenatt fem stader i natt – no blir Noreg delt i to

– Natt til måndag vart det registrert tropenatt fem stader i Noreg, seier vakthavande meteorolog Sigrid Auganæs ved Meteorologisk institutt i Tromsø til NTB.

På Sømna i Nordland gjekk ikkje temperaturen under 23,1 grader i løpet av natta. I Møre og Romsdal hadde Kristiansund 21,1 grader og Lebergsfjellet 20,5. Medan Bygdøy og Hovin i Oslo òg hadde tropenatt med minimumstemperatur på rett over 20 grader.

– For at det skal reknast som tropenatt i Noreg må det aldri bli under 20 grader i løpet av kvelden og natta, seier Auganæs. Det er Vestfold som har flest tropenetter i Noreg.

Sommarvarmen flyttar seg nordover

Varmen frå aust har flytta seg vestover og nordover og gir høge temperaturar heilt frå Vestlandet til Nordland, Troms og Finnmark måndag og tysdag. Høgtrykket ligg no vest for Lofoten.

– Også tysdag er det venta gode sommartemperaturar i store delar av landet, seier Auganæs. Nordland kan passera 25 grader, medan Troms og Finnmark får over 20 grader fleire stader.

Aller finast ser vêret ut til å bli nord i Trøndelag og på Helgeland, der det er venta dagar med temperaturar over 30 grader.

I Namsos er det mellom anna varsla temperaturar opp mot 35 grader tysdag. Dermed kan den 55 år gamle nasjonale rekorden på 35,6 grader bli utfordra.

Farevarsel for styrtregn

Meteorologisk institutt har sendt ut gult farevarsel for styrtregn på delar av Austlandet frå måndag ettermiddag til natt til tysdag. Det mest av nedbøren er venta nord for Oslo og rundt Mjøsa i Innlandet.

– Me oppmodar folk til å vera førebudde på raske vêrskifte, seier meteorologen.

Farevarselet gjeld frå klokka 12 måndag 14. juli til klokka 01 natt til tysdag 15. – Kraftige regnbyer er venta lokalt. Nedbøren kan passera 20 millimeter per gong enkelte stader, forklarer meteorologen. Det er mogleg å følgja utviklinga på vêrradaren på yr.no.

Det blir åtvara om fare for:

* Overvatn i tettbygde strøk.

* Jord- og flaumskred der dei kraftigaste byene treffer.

* Lyn i samband med regnbyene.

Trass i dei høge temperaturane er det ikkje snakk om ei offisiell hetebølgje. For at Meteorologisk institutt skal kalla det for hetebølgje i Noreg, må det vera ein makstemperatur på 27 grader fem dagar på rad.

(©NPK)