Tipsa om kvite varebilar

Politiet har fått ein del tips om observasjonar av kvite varebilar, seier Andor Helgheim, politioverbetjent i Kvam, Fusa og Tysnes lensmannsdistrikt.

Helgheim seier at kvite varebilar i seg sjølve ikkje treng å gi grunn til bekymring.

– Men me får enkelte meldingar om bilar som køyrer inn til bustadhus og i bustadfelt der det normalt ikkje er mykje gjennomgangstrafikk. Viss ein meiner at nokon oppfører seg mistenkeleg, synest me uansett at det er ein god forholdsregel å prøva å notera seg registreringsnummer og biltype, seier Helgheim.

Politiet kan sjekka tips mot registrerte bilar som har vore involverte i kriminalitet.

– Folk er stort sett veldig oppegåande. Når me ber om tips, er folk flinke til å ringa inn. Det er betre å ringa ein gong for mykje enn ein gong for lite, seier han.

Han synest derimot ikkje at ein bør publisera bilete i sosiale medium.

– Å henga ut folk og skulda dei for å vera kriminelle, utan at ein veit noko, er ikkje bra. Då kan me få ein offentleg gapestokk. Me har trass alt eit prinsipp om at ein er uskuldig til det motsette er bevist. Det er ei grei ordning, seier Helgheim.