Tek imot overgrepsoffer i Hardanger

Senteret mot incest og seksuelle overgrep i Hordaland (Smiso) har oppretta kontor i Kvam. – Me trur det er utruleg viktig at me er her, seier Linda Nordrik.

To av ti norske kvinner oppgir å ha vorte utsett for ei form for seksuelt overgrep før dei fylte 18 år, ifølge Barne-, ungdoms- og familiedirektoratet (Bufdir). For menn er talet éin av ti. Éin av fire oppgir at dei ikkje har fortalt om overgrepa til nokon.

– Nokre har kanskje bore på ein løyndom i tjue år. Dei kan ha strevd med ulike ting, hatt problem med relasjonar eller eteforstyrringar. Kanskje har dei oppsøkt lege for symptom som kjem av seksuelle overgrep. Det å opna seg opp, å tora å snakka om det og verta trudd, trur me kan bidra til at ein kan verta betre, seier fagleg rettleiar Linda Nordrik.

Smiso tilbyr gratis hjelp utan tilvising til personar som har vorte utsette for incest eller seksuelle overgrep, og til pårørande. Kven som helst kan oppsøka senteret – unge og vaksne, menn og kvinner.

Senteret skal flytta inn i Kvam familie- og læringssenter (KFL) etter nyttår. Til dess held det til på helsestasjonen.

Stort tabu

Nordrik og Benedicte Skålnes Arntzen, nestleiar i Smiso Hordaland, er på kontoret i Norheimsund annankvar onsdag. Det lønar seg å tinga time, seier dei.

Arntzen og Nordrik seier at terskelen for å oppsøka senteret skal vera låg. Dei meiner eit lokalt nærvær kan senka terskelen. Personar frå heile Hardanger kan komma til senteret i Norheimsund, og slepp dermed å ta turen til Bergen. Når Smiso flyttar inn i KFL, ligg kontoret dessutan anonymt til.

Samstundes kan det vera lettare å snakka med personar som kjem utanfrå.

– Det er eit stort tabu knytt til dette. Då kan det vera greitt å snakka med nokon utanfrå, som du slepp å møta på butikken, seier Nordrik.

Arntzen og Nordrik understrekar at Smiso ikkje driv med behandling.

– Men me har lang erfaring med å snakka med folk som har det vanskeleg. Målet vårt er å hjelpa menneske til å ha det betre i livet, og til å kunna hjelpa seg sjølve, seier Nordrik.

Deler kunnskapen

Arntzen seier at Smiso har fått ei god mottaking i Kvam.

– Det har vore positivt. Fagfolk har ønskt oss velkomne. Det har ikkje vore vanskeleg å etablera seg her, seier ho.

5. november skal det arrangerast ein fagdag i lag med avdelingane for oppvekst, born og unge, skule og helse i heradet, for å dela erfaringar og informasjon.

Smiso tilbyr òg undervisingsopplegg til vidaregåande skular og ungdomsskular om grenser og førebygging av seksuelle overgrep.

– Det er eit tilbod me kan gi utover samtalar. Førebygging er utruleg viktig – både å førebygga overgrep og overgriparar, seier Nordrik.

Kvam herad har gitt årlege driftstilskot til Smiso Hordaland sidan 2009. Då var tilskotet på 5.000 kroner. I 2018 og 2019 gir kommunen fem kroner per innbyggar, altså vel 40.000 kroner. I 2017 fekk senteret tilskot frå alle kommunane i Hordaland unnateke to.