Storbutikk med bakt potet:
– Det er greitt å ha ein sparegris
Potamadre leverte eit solid første heile driftsår i 2025. Rekneskapen viser eit driftsresultat på 5,6 millionar kroner, etter ein omsetnad på drygt 29 millionar. Det gir ein driftsmargin på 19,1 prosent, skriv Avisa Hordaland.
– Eg synest det er ganske artig å tenkje på kor mange poteter dei millionane faktisk er, seier gründeren av Potamadre AS, Kaj Hereid Myklatun, til lokalavisa.
Han forklarer at overskotet gjer at dei kan driva verksemda utan stress eller press til å gjere ting dei ikkje vil, som til dømes å skru opp prisen.
Annonse
– Vi må vere smarte med det vi har bygd opp, så vi skal spare overskotet i aksjefond og slikt, fortel Myklatun til avisa.
Potetgründeren legg likevel ikkje skjul på at han tenkjer framover. Dei neste vognene skal opnast i Ålesund og Volda. Samstundes har han tenkt ut fleire andre plassar der han har lyst til å utvida verksemda.
– Eg har lyst til å få til noko på Austlandet, men eg må finna nokon som vil driva det. Eg vil også til Os, og kanskje ha ei vogn til i området rundt Bergen. Vi vil fortsetje på den gode tralten vi er på no, avsluttar han.
I dag har verksemda 14 aktive matvogner og ei som går rundt på festivalar og andre arrangement. I tillegg har dei i 2026 hatt ein del franchisetakarar. Desse er spreidde over heile Vestland og delar av Rogaland, mellom anna i Odda, Vossavangen, Skulestadmoen, Eidfjord, Åsane, Haugesund, Bergen, Sogndal, Førde, Hillevåg, Sandnes, Ålgård og Stryn.
Annonse
(©NPK)
