Språkrådet positiv til bruk av gamle fylkesnamn

Noreg har fått mange nye fylkesnamn frå årsskiftet, men Språkrådet meiner det framleis er fritt fram å bruka gamle namn på geografiske område.

Det er Trønder-Avisa som kan har eit gladnyhende til alle trønderar som ikkje ser på seg sjølve som berre trønderar, men som nordtrønder eller midttrønder eller sørtrønder for den saks skuld.

Trøndelag var tidlegare ute enn landet elles og vart eitt fylke allereie 1. januar 2018.

Ifølgje avisa er det mange som meiner at det berre er dei nye omgrepa som skal nyttast, men der trør Språkrådet til og roar. Det er heilt greitt å bruka dei gamle omgrepa så lenge ein snakkar om dei geografiske områda.

– Det er fullt mogleg å bruka Nord-Trøndelag som namn på det geografiske området som tidlegare var Nord-Trøndelag fylke. Og det sjølv om fylket i dag er fusjonert med tidlegare Sør-Trøndelag fylke til eit administrativt område som ber namnet Trøndelag, seier seksjonssjef Daniel Gusfre Ims i Språkrådet.

Ims trur mange av dei gamle fylkesnamna vil leva vidare som områdenamn, og nemner som eksempel Sunnmøre og Nordmøre og både Ryfylke, Haugalandet, Jæren og Dalane i Rogaland.

– Folk i Østfold diskuterer no om dei framleis kan kalle seg østfoldingar. Det er typisk at dette spørsmålet kjem frå Østfold. Og svaret er ja. Dei kan kalla seg østfoldingar, fordi dei er frå eit geografisk område som framleis kan kallast Østfold, seier Ims, som er litt meir i tvil om kva folk i Akershus og Buskerud kan kalla seg.

NPK-NTBredaksjon@hf.no