Set tak for deltaking i gravferder

Maksimalt 50 personar får delta i gravferder – og dei må sitja spreidd.

Det opplyser kyrkjeverje Hans Soldal i Kvam.

Dei som er til stades, må sitja minst éin meter frå einannan. Difor vert berre annankvar benk teken i bruk.

– For pårørande er det naturlegvis ei vanskeleg sak å avgrensa. Difor vil kyrkjetenar og gravferdsbyrå plassera frammøtte etter denne norma til 50 er nådd. Kommuneoverlegen er orientert om ordninga, opplyser Soldal.

Kyrkjeverja har fastsett at berre nær familie og vener får tilgang til gravferdsseremoni i kyrkja.

God handhygiene vert framheva, og handsprit er montert ved inngangsdøra. Tradisjonar som handhelsing og klemming må ein stå over.

– Det er mange måtar å visa omsorg og medkjensle på sjølv om ein ikkje får plass i kyrkja. Me er overtydde om at folk gjer gode vurderingar i slike vanskelege høve, seier Soldal.

Norma for deltaking kjem frå Bjørgvin bispedøme og gjeld til 26. mars. Bispedømet opplyser på heimesida si at dåp og vigsler kan gjennomførast om det er særleg grunn til det. Gudstenester er avlyste i perioden. Konfirmasjonsgudstenester i vår kan verta utsette til etter sommaren.