Rypa vert eit lett offer for rovdyr i eit landskap utan snø
Når dagane blir kortare, skiftar rypa fjør for å gå i eitt med snøen. Men på grunn av klimaendringane skjer det oftare at rypa er kledd i kvitt medan omgivnadene framleis er grå.
– I dei åra der snøen kjem seint, blir dei kvite fuglane tydelege målskiver for rovfuglar og rovdyr, som til dømes kongeørn og jaktfalk, seier Eivind Flittie Kleiven, forskar ved Norsk institutt for naturforsking (NINA), i ei pressemelding.
Kleiven medverkar også i forskingssenteret COAT, saman med mellom anna forskarar frå Meteorologisk institutt (MET). Her har dei følgt med på rypebestandane i nord i fleire år.
Annonse
På grunn av klimaendringane har dei meteorologiske årstidene forskyvd seg: hausten byrjar og sluttar seinare.
– Sommarsesongen kan no strekkja seg inn i oktober. Samtidig krympar vinteren – og vil etter kvart forsvinna heilt frå fleire kystområde i landet, forklarer Helene Birkelund Erlandsen, klimaforskar ved MET og i COAT.
Sjølv om haustsesongen endrar seg, følgjer dagane vanlege syklusar: vi merkar at det no blir mørkare veke for veke. Det gjer også rypa, fortel Kleiven.
– Når lengda på dagen blir tilstrekkeleg kort, set det i gang fjørskiftet (myting) hos rypene, uavhengig av om den første snøen er rett rundt hjørnet eller ikkje.
Annonse
(©NPK)
