Ras og stengde vegar på Vestlandet

Fleire vegar er framleis stengde, og bygda Fresvik i Sogn og Fjordane er isolert etter det dårlege vêret på Vestlandet sundag og natt til måndag.

Fleire fylkesvegar og fjellovergangar vart stengde sundag på grunn av uvêret. Måndag morgon er fleire opna, men nokre er framleis stengde.

Det gjeld mellom anna riksveg 13 over Vikafjellet, som vart stengd på grunn av uvêr og flaum søndag. Ny vurdering vert gjort klokka 12. Fylkesveg 53 mellom Tyin og Årdal vart opna litt før klokka ni etter å ha vore stengd sidan sundag.

Riksveg 52 over Hemsedalsfjellet er opna, men det kan verta innført kolonnekøyring på kort varsel. Det same gjeld riksveg 7 over Hardangervidda og riksveg 15 over Strynefjellet.

Glatte vegar, innstilte ferjer

Vegtrafikksentralen åtvarar mot svært glatte vegar på fleire av fjellovergangane, og oppmodar større køyretøy til å bruka kjetting.

Det er ikkje meldt om alvorlege ulukker med personskadar, men riksveg 7 over Hardangervidda var stengd ein periode etter ei bilulykke, for deretter å opna igjen ved tretida natt til måndag.

Måndag morgon melder fleire ferjeselskap på Vestlandet om innstilte ruter på grunn av uvêr. Dette gjeld mellom anna hurtigbåttilbodet mellom Ålesund og Hareid, der alle avgangane på morgonen førebels har vorte innstilte, og dessutan mellom Molde og Vestnes. Også ferja mellom Kvanne og Rykkjem i Møre og Romsdal har vore innstilt i morgontimane.

I Trondheim vert det køyrt buss for båt sidan hurtigbåten mellom Trondheim og Kristiansund er innstilt på delar av strekninga. Båten går berre til Brekstad. Passasjerar som skal til Kristiansund, må ta rutegåande buss frå Trondheim, medan strekninga Trondheim-Sandstad vert køyrd med innleigd buss, opplyser FosenNamsos Sjø.

Stor fare for snøskred

NVE skreiv før helga ut eit oransje farevarsel for jordskred i både Hordaland, Sogn og Fjordane og delar av Møre og Romsdal. Jordskredvarselet vert halde på same nivå måndag, og i tillegg er snøskredvarselet for Indre Fjordane, Voss og Hardanger no på raudt nivå.

Det kom mykje regn måndag morgon, og høge temperaturar og mykje vind fører til stor snøsmelting. Utover dagen er det venta at nedbøren vil minka noko.

I tillegg er det skrive ut varsel om flaum, jord-, sørpe- og flaumskredfare på gult nivå for delar av Trøndelag, Nordland og Sør-Troms.

200 isolerte i Fresvik

Fylkesveg 5602 mellom Fresvik og Feios i Vik kommune vart stengd sundag på grunn av steinras og fare for ras. Det same gjeld fylkesveg 5600 mellom Arnafjord og Vikøyri. Ingen vart skadd i rasa.

Det skal gjerast ei ny vurdering av om vegane kan opna klokka 12 måndag.

Rundt 200 innbyggjarar i Fresvik er framleis isolerte som følgje av raset. Mange er òg utan straum, og det er usikkert når han kjem tilbake.

Mannskap frå Sognekraft kunne ikkje gå inn i rasområdet sundag kveld, og ei ny vurdering og forsøk på å finne feilen skal derfor gjerast måndag morgon.

NPK-NTB-Per-Helge Bergredaksjon@hf.no