Ope møte for inviterte partar

I ettermiddag er det ope møte om Øystesevassdraget i Holmatun i Øystese. Det er ikkje kunngjort.

Korkje i HF eller på Kvam herad si heimeside er møtet klokka 16 annonsert.

Årsaka, fortel kommunikasjonsrådgjevar Harald Eikenæs Vengen i Olje- og energidepartementet, er at møtet ikkje er eit ordinært folkemøte, men eit orienteringsmøte for inviterte partar. Møtet er likevel ope for alle.

Vengen er usikker på kva som er vanleg praksis for kunngjering av slike møte i samband med sluttsynfaring, men påpeikar at utbyggjarselskapa BKK produksjon AS og Øystese kraft AS har alt det praktiske ansvaret for å arrangera møtet og synfaringa.

Invitasjonen til møtet og synfaringa vart send frå departementet 27. juni. Han vart send til mellom andre heradet, Samnanger kommune, Fylkesmannen, fylkeskommune, vegvesenet, turlag, Naturvernforbundet, grunneigarar, Øystese jeger- og fiskarlag, Vernelaget for vassdrag, Kyrkjevika hyttelag, Øystese grendelag, Liv Lyngstad, Even Øyri og Kristin Andresen Soldal.

Torsdag er det synfaring. Deltakarane skal fly med helikopter til Vossadalsvatn på føremiddagen. Etter lunsj vert det synfaring nedom Fitjadalsfatnet.