Langt færre kommunar i ordninga for sletting av studiegjeld
I forslaget til statsbudsjett blir det foreslått ei studiegjeldssletteordning for 88 distriktskommunar. Det er mange færre enn i det opphavlege forslaget.
Regjeringa vil slette 25.000 kroner av studiegjelda årleg i inntil tre år for dei som bur i dei 88 minst sentrale kommunane i Noreg, skriv Kunnskapsdepartementet i ei pressemelding. Samtidig blir satsen for gjeldslette for dei som bur i den såkalla innsatssona i Finnmark og Nord-Troms, dobla.
– Med ordninga kan eit ungt, nyutdanna par som bur i dei 88 minst sentrale distriktskommunane få sletta opp mot 150.000 av studiegjelda over tre år, seier forskings- og høgare utdanningsminister Sigrun Aasland (Ap).
Annonse
Slik det blir lagt opp til, er det dei som bur i dei minste kommunane, i den såkalla sentralitetssone 6, som blir inkluderte i ordninga.
Men opphavleg gjaldt forslaget 212 kommunar, og inkluderte då sentralitetssone 5. Regjeringa, som Senterpartiet då var ein del av, rekna med at det kom til å koste i overkant av 1,3 milliardar kroner. Dette forslaget kom i statsbudsjettet for 2025, men ordninga skulle først tre i kraft i 2026.
Det nye forslaget kostar 437 millionar kroner.
– Det er krevjande økonomiske tider, og regjeringa har måtta gjere prioriteringar. Vi meiner den nye ordninga framleis er med på å styrkje distrikta, seier Aasland.
(©NPK)
