Lakselus påverkar talet på og alder på villaks som gyter

Ein ny studie viser at mykje lus på utvandrande laksesmolt har ein klar samanheng med at færre gytefisk vender tilbake etter eitt år.

Det er forskarar ved AquaLife R & D, Norsk Regnesentral og Veterinærinstituttet som har utvikla ein statistisk modell for å talfeste samanhengen.

Studien viser ein signifikant samanheng mellom mykje lus på den utvandrande laksesmolten og eit lågt tal fisk som returnerte som gytefisk etter eitt år i sjø.

På fisk som hadde vore to år i sjø var det ingen tydeleg effekt. På fiskane som hadde vore tre år i sjø var effekten motsett. Éi mogleg årsak til forskjellen mellom årsklassane er at lusepåkjenning kan forseinke vekst og kjønnsmodning, slik at ein større del vender tilbake først etter tre år.

Totalt sett antydar studien at jo større lakseluspåkjenning desto færre villaks returnerer til elvane for å gyte i tillegg til at lakselus påverkar alderssamansetninga hos gytefisk.

– Vi meiner det er rimeleg å rekne med at denne samanhengen kjem av at lakselus fører til ei stor belastning på utvandrande smolt i form av auka dødelegheit og utsett gyting, seier seniorforskar ved veterinærinstituttet Kari Olli Helgesen i ei pressemelding.

(©NPK)