Kvam får vera med på valdsprosjekt

Kvam, Oslo, Drammen, Tromsø og Trondheim får vera med på eit valdsførebyggingsprosjekt i skulen.

Det er kunnskaps- og integreringsminister Jan Tore Sanner (H) som har bede Kvam herad om å vera med i eit nasjonalt nettverk.

Kvam herad har takka ja til tilbodet ettersom det kan gje betre innsikt i eit tema som er aktuelt for Kvam.

Avviksmeldingar frå tilsette i Kvam herad viser nemleg at dei vert utsette for utagerande og valdeleg framferd hjå elevar. Det kan vera eit uttrykk for utryggleik og mistrivnad hjå elevane, og kan vera ubehageleg for lærarane.

Ifølgje mandatet skal kunnskapsministeren etablera ei gruppe som tek eit sams ansvar for å identifisera gode metodar for å førebyggja og handtera utagerande framferd og vald i skulen. Tanken er at røynslene skal kunna delast med andre skuleeigarar, og at dei utvalde kommunane skal støtta andre kommunar som arbeider med problemstillinga.

Kvam herad fekk melding om deltakinga før jul, og varsla tilsette om henne, men fyrst 27. desember vart ho offentleggjord i ei presseelding av departementet.