Kjerringkleiv vert politikk

I ei interpellasjon frå Odd Valland Bovim (MDG) til møtet 18. juni vert rådmannen beden om å svara på kva Kvam herad har gjort for å vurdera trafikktryggleiken i den bratte og smale vegen i Øystese.

Bakgrunnen er at BIR Husholdning AS har varsla ynske om ny hentestad for bos frå bustadene langs vegen. Renovasjonsbilane har nemleg utfordringar med å koma fram i vegen, særleg på vinterføre. BIR har difor føreslege ein felles hentestad anten øvst eller nedst i vegen.

Bebuarane har på si side peika på at ei slik løysing vil vera til ulempe for dei som bur der. Dei har forståing for at vegen er krevjande for renovatørane, men har bede om at heradet heller vurderer tiltak som kan gjera det tryggare å halda fram med henting langs vegen.

I april skreiv HF at bebuarar bad Kvam herad om å stengja Kjerringkleiv for gjennomkøyring. Dei meiner gjennomgangstrafikken ikkje er naudsynt, og at mindre trafikk vil gjera vegen tryggare både for dei sjølve og for renovatørane. Dei peika på at brøyting og strøing er viktig.

Kort tid etter svara rådmannen at det ikkje er aktuelt å stengja vegen eller gjera han einvegskøyrd. Ynsket frå bebuarane hadde vore drøfta i den interne trafikktryggleiksgruppa.

Rådmannen viste til at kommunale vegar som hovudregel skal vera mest mogleg opne og tilgjengelege for alle. Ei stenging kan få negative konsekvensar for mellom anna naudetatar, drift og vedlikehald, heitte det i svaret.

No vert saka altså lyfta politisk. I interpellasjonen spør Bovim om rådmannen kan stadfesta om Kjerringkleiv er kommunal veg, og om Kvam herad i så fall sjølv har makt til å gjera skiltvedtak om einvegskøyring, forbod mot gjennomkøyring eller andre trafikkregulerande tiltak på strekninga.

Vidare spør han om kva konkrete vurderingar som er gjorde av trafikktryggleiken i Kjerringkleiv, og kva som ligg til grunn for at ynsket om stenging for gjennomkøyring eller einvegskøyring er avvist.

Rådmannen vert òg beden om å svara på om heradet har vurdert meir avgrensa eller mellombelse tiltak. Mellom døma i interpellasjonen er vinterstenging, gjennomkøyringsforbod med unntak for naudetatar, drift og renovasjon, betre strøing og brøyting eller ei prøveordning i ein avgrensa periode.

Føremålet med interpellasjonen er å sikra at innbyggjarane vert lytta til, og at heradet vurderer konkrete og forholdsmessige tiltak før ulempa eventuelt vert flytta over på bebuarane.

Rådmannen må svara i heradsstyremøtet 18. juni.