Handegard gjev seg i fylkespolitikken

Sigrid Brattabø Handegard (Sp) frå Jondal stiller ikkje til ein ny periode i Vestland fylkesting. Nominasjonsnemnda i Vestland Senterparti vil ha Aleksander Øren Heen på toppen av lista til valet i 2027.

Handegard skriv på Facebook at ho har meldt frå til nominasjonsnemnda om at ho ikkje er aktuell for ein ny periode. Ho viser til at ho har bak seg 35 år som folkevald eller i politiske verv lokalt, regionalt og nasjonalt.

– Skal bli fint å styra tida si litt meir sjølv! Men jobben er ikkje gjort før til neste haust! Eg skal stå på og kjempa for viktige saker heilt i mål, skriv Handegard.

Handegard er fylkestingsrepresentant for Sp og leiar i hovudutval for næring. Ho leier elles reglementsutvalet.

Nominasjonsnemnda har førebels lagt fram dei fem øvste namna. Bak Heen fylgjer Sara Hamre Sekkingstad frå Alver, Jakob Bjelland frå Stord, Steffen Fjellestad frå Gloppen og Tonje Ljones Såkvitne frå Voss. Det kan tyda på at fylkesordførar Jon Askeland ikkje tek attval, noko ein artikkel i Bergens Tidende stadfestar.

Det fullstendige framlegget med 71 kandidatar kjem seinare. Den endelege fylkestingslista vert vedteken av nominasjonsmøtet i Sogndal 14. november, opplyser Vestland Senterparti i ei pressemelding.