Haug: – Uroa over helsetenestene

– Me meiner alvor med korona-tiltaka, seier Ullensvang-ordførar Roald Aga Haug.

Styresmaktene innførte i går ei rekke tiltak for å hindra korona-spreiing, mellom anna stenging av skular og barnehagar og forbod mot kulturarrangement. Det vert oppmoda om å unngå reiser både innan- og utanlands, offentleg transport og andre stader der du kjem nær andre personar.

– Ein meiner alvor med tiltaka, og me ser at veldig mange tek dei på alvor, men òg at nokre ikkje tek dei alvorleg nok, seier Haug.

Han oppmodar folk på det sterkaste om å redusera sosial kontakt til det heilt naudsynte, og om å unngå å kryssa kommunegrensa dersom ein ikkje har viktige ærend. Kommunen har i ei pressemelding oppmoda hytteeigarar om å halda seg unna Ullensvang, både med tanke på smittespreiing og kapasiteten på sjukehuset om hyttebuarane skulle verta sjuke.

Allereie sprengt

Det som bekymrar kommunen mest, er å ha nok friske personar i kritiske stillingar, særleg legar og sjukepleiarar.

Ullensvang har full legedekning, men fleire legar er sette i karantene. Ein har frå før berre ei minimumsbemanning av sjukepleiarar.

Det har fredag ettermiddag ikkje vorte påvist koronasmitte i kommunen, men helsetenestene er allereie pressa, seier Haug.

– Difor er det viktig at folk skjønar behovet for å halda seg i ro. Me ser at det ikkje skal mykje til før me hamnar i ein vanskeleg situasjon. Det vil verta eit mareritt om legar og sjukepleiarar ikkje kan gå på jobb. Det er me veldig opptekne av å unngå, seier han.

Kommunen arbeider med å kartlegga og planlegga for ein eventuell krisesituasjon. Mellom anna har ein fått ledige hender innan oppvekstsektoren som kan bidra, seier Haug.

Ein legg dessutan vekt på at personell innan reinhald og renovasjon skal vera i stand til å gjennomføra oppgåvene sine.

Følger situasjonen

Fredag ettermiddag var Haug i møte med den kommunale kriseleiinga, som består av ordførar, rådmann, kommunelege, smittevernlege og einingssjefar.

Haug fortel at kommunen følger situasjonen kontinuerleg.

– Det er ein stor jobb for leiarane å organisera dei tilsette. Dei som kan, arbeider heime. Me må omorganisera tilbod og turnusar for å tilpassa oss.

Innbyggartorga i kommunen er stengde.

– Eg vonar at me klarar å inspirera dei tilsette til å sjå det som ei viktig oppgåve å gjera ein solid innsats for å få minst mogleg avvik, seier Haug.

Næss: – Ikkje reis på hytta

I ei tekstmelding til folk som eig hytte på Kvamskogen, ber Kvam herad hytteeigarane om å ikkje reisa til Kvam.

I eit innlegg på Facebook viser ordførar Torgeir Næss til oppmodinga frå Helsedirektoratet om å unngå fritidsreiser.

– Koronatiltaka er ein stor nasjonal dugnad. Hyttefolket sitt bidrag er viktig for å unngå smittespreiing, skriv Næss.

Han viser òg til omsynet til kapasiteten til den lokale helsetenesta.