Har byrja førebu seg på koronasmitte

Kommuneoverlege i Kvam, Dag Erlend Skjelbreid, fortel at kommunen har byrja førebu seg på at koronaviruset covid-19 kan nå Kvam. Han oppmodar dei som mistenkjer at dei er smitta, om å kontakta lege på telefon, men berre dersom dei anten har vore i eit område med spreiing av viruset dei siste 14 dagane, eller i nærkontakt med ein person som er smitta i løpet av dei siste 14 dagane.

Symptoma på koronasmitte er som ved andre luftvegsinfeksjonar. Sjukdomen smittar som vanlege luftvegsinfeksjonar. God hoste- og handhygiene reduserer faren for smitte.

Dei som er sjuke, bør unngå å hosta eller nysa direkte på andre. Den sjuke bør freista hosta og nysa i olbogekroken eller i eit papirtørkle, som dei kastar etterpå. Friske bør, når det er mogleg, halda minst éin meters avstand til personar med luftvegssymptom.

Fredag opplyste Bergens tidende om at ein person i Bergen er smitta. Så langt er det ikkje meldt om tilfelle i Hardanger.