Gode tal for rype og skogsfugl

I august har frivillige landet rundt gått om lag 5000 kilometer i Statskogs jaktterreng – og no er konklusjonen klar, skriv Statskog i ei pressemelding.

– For rypebestanden er det, grovt sett, svært gledelege tal for Nordland og Troms, middels i Trøndelag og gode tal på jaktområda våre lenger sør, seier fagsjef i Statskog, Jo Inge Breisjøberget.

Det er også ganske høge tettleikar av skogsfugl (tiur, røy, orrfugl), trass i ei middels god overleving av kyllingar.

Sidan 2006 har Statskog gjennomført stadig meir omfattande teljingar, og etablert eit system der jakttrykket varierer i takt med bestandane. I dårlege år slepp få eller ingen jegerar til, i gode år slepp fleire til.

– Trenden over to tiår tyder på at vi får til å kombinere ei godt regulert jakt med livskraftige bestandar i jaktområda våre. Vi ser også at nokre enkeltområde løftar seg ut av ein periode med elendige tal. Det gjeld mellom anna område i Troms, Nordland og Dovre, seier Breisjøberget.

(©NPK)