Gjerde spør om mobbing

18,8 prosent av elevane på 5. trinn som svara på elevundersøkinga, kjenner seg mobba. Korleis fylgjer Kvam herad opp mobbesaker?

– Me ligg langt over gjennomsnittet nasjonalt og i Vestland, og me ligg lenger enn nokon gong frå ein nullvisjon.

Det skriv Håvard Gjerde (R) etter å ha lese tal frå elevundersøkinga førre skuleår, som Dagbladet har offentleggjort. Tala syner at 18,8 prosent av elevane på 5. trinn, 11,9 prosent på 7. trinn og 14,1 prosent på 10. trinn kjenner seg mobba i Kvam herad. Høvesvis 80, 118 og 99 deltok i granskinga på dei tre trinna.

– Som politikarar kan me ikkje sitja roleg og sjå på dette. Me treng å vita kvar ressursane må setjast inn for å snu utviklinga. Me treng å vita om mobbeoffera og dei føresette vert høyrde og tekne godt nok vare på. Ikkje minst treng me å vita om heradet har kompetansen som skal til for å handtera situasjonen, skriv Gjerde i eit spørsmål til rådmannen i samband med heradsstyremøtet tysdag 3. oktober.

Han spør seg om det må meir til enn å tilsetja miljørettleiarar.

Gjerde viser til at Øystese skule er sett under tilsyn av Statsforvaltaren. Tilsynet gjeld oppfylging av skulemiljøet. I tillegg har han varsla ei mogeleg tvangsmulkt for manglande oppfylging i ei sak etter paragraf 9A i opplæringslova – på folkemunne kalla mobbeparagrafen.

Gjerde vil vita om det er faglege eller økonomiske vurderingar som har medført at aktivitetsplikta i paragrafen ikkje er godt nok fylgd opp, kor mange slike saker Kvam har og har hatt, om heradet skaffar seg kompetanse til å redusera omfanget av mobbing, om tilgjengelege tilbod om tenester vert nytta, om skulane har nok tilsette, og om mobbeoffer får gode nok tilbod.

Mobbestatistikken er ikkje offentleggjord i tilstandsrapporten for grunnskulen, som vart drøfta av heradsstyret før ferien. Årsaka er personvernreglar. Gjerde meiner det er synd, sidan tala etter hans syn vitnar om langt viktigare ting enn nasjonale prøvar.