Framlegget om nye bomtakstar i Kvammapakken: – Ikkje mindre enn galskap

Auka bomtakstar for lastebilar vil gå ut over arbeidsplassar i distrikta, seier Jan-Ove Halsøy i Norges lastebileier-forbund (NLF). Eva Grimstad i Kvamskogen vel trur takstane vil gjera det mindre freistande å reisa til Norheimsund.

Vert dei føreslegne bomtakstane i Kvammapakken røyndom, vil det innebera ein auke på 262 prosent for tunge køyretøy som nyttar dagens ordning med 50 prosent rabatt.

– Det er direkte uhøyrt, seier Halsøy, som er regionsjef for Hordaland, Sogn og Fjordane og Møre og Romsdal i NLF.

– Ein føreslår å auka ein takst med 260 prosent nesten over natta. Det er identisk med Vossapakko, som auka frå 47 til 168 kroner. Det er berre det offentlege som kan tura fram med slike enorme aukar.

Også takstane på Hardangerbrua har auka betydeleg. I tillegg vert rabatten for tunge køyretøy på ferjer redusert.

• Les også: Rådmannen tilrår nye takstar

Trygve Laupsa i Jan Mo AS opplyser at verksemda har 20 bilar i dag, og har avtale med 50 prosent rabatt på alle. Han veit ikkje nøyaktig kor mykje pengar verksemda bruker på bompengar, men seier at det med 20 bilar vert store summar.

– Mykje av transporten vår er til og frå Bergen eller Voss, slik at det vert bompasseringar både i Kvam og på Voss eller i Bergen. Med dei nye takstane vil ein tur til Voss kosta 680 kroner for ein lastebil, opplyser han i ein e-post til HF.

Sjølv om det vert innført eit passeringstak på 25, vil det verta ein monaleg auke for Jan Mo, og det kan medføra auka transportprisar for kundane, skriv Laupsa.

– Næringslivet vil lida

Halsøy seier at lastebilnæringa må vidarefakturera bompengane til næringslivet, noko han seier vil svekka konkurranseevna til bedriftene, og deretter arbeidsplassane i distrikta.

– Bompolitikken er distrikts- og vestlandsfiendtleg. Eg veit ikkje kva ord eg skal bruka for å illustrera kor frustrerte me er, seier han.

Sjølv om det vert innført eit passeringstak som gjer at ein berre betalar for 25 passeringar i månaden, vil dei færraste lastebilane vera i nærleiken av å nå taket, seier Halsøy.

– Dei fleste vil måtta betala full pris. Det er galskap.

Utfordringar med likviditeten er òg eit problem for selskapa, seier Halsøy.

– Eg får telefon frå enkelte som nær sagt grin og seier at farten inn mot skifteretten auker, for dei har ikkje likviditet til å meistra bompengane og får ikkje vidarefakturert utgiftene til næringslivet i den grad dei burde, seier han.

– Set fingeren i jorda!

Halsøy seier at kommune- og fylkesvalet neste haust vil verta eit val for eller mot bompengar.

– Viss politikarane ikkje ser konsekvensane av vedtaka, trur eg mange politikarar vil verta arbeidsledige frå neste haust. Dei folkevalde må stikka fingeren i jorda og ta til fornuft.

Han meiner det ikkje skal vera slik at bompengar skal løysa økonomiske utfordringar ein kommune eller fylkeskommune har sett seg i.

– Har ein ikkje råd til å investera i dyre tilbod, må ein faktisk utsetta det. Ein er akkurat like avhengig av at samfunnet har oppegåande, solide verksemder med trygge og gode arbeidsplassar. Slik vert det ikkje med dei aukane ein får framover, seier han.

• Les også: – Elbilar bør betala bompengar

– Uheldig

Også Eva Grimstad, styreleiar i Kvamskogen vel, meiner dei føreslegne takstane er uheldige. For personbilar er minsteprisen føreslått auka frå 23,50 til 40,80 kroner, medan prisen utan rabatt er føreslått auka frå 47 til 51 kroner.

– Reknar du fire personar per hytte, er me om lag ni tusen personar på Kvamskogen, som gjerne køyrer ned i Norheimsund og handlar. Med ein auka bompengepris er det klart at det vert mindre freistande å reisa ned, så eg synest ein auke vil vera uheldig for forretningsstanden, seier ho.

Ho seier at nokre av hytteeigarane har eit veldig positivt forhold til Norheimsund, og difor truleg vil tola litt meir bompengar.

– Det er nok forskjellig, men eg trur det vil vera ei veldig negativ sak for fleirtalet. Kanskje vil det føra til at ein heller reiser andre vegen viss ein skal handla.

Grimstad legg til at Kvamskogen vel vil at fartsgrensa over Kvamskogen mellombels skal settast ned til 60 kilometer i timen.

– Skal hyttebuarane måtta betala ekstra for å reisa ned til Norheimsund, må me få noko tilbake. Me ønsker ei lågare fartsgrense inntil me har ei betre, permanent løysing. Det kan nok sukra pilla for oss, seier ho.

Føremålet med endringane er ikkje å ta inn fleire pengar i bomstasjonane – inntektsnivået er rekna til å skulla samsvara dagens nivå – men å kutta i dei administrative kostnadane, slik at meir av pengane vert brukte til veg, ifølge Statens vegvesen.

Formannskapet handsamar saka i morgon. Heradsstyret skal gjera vedtak 19. desember.