Fire høgthengande bryllaup

Verdas fyrste – og dei tre neste – bryllaup på Trolltunga fann stad laurdag.

Etter å ha gått ein éi mil lang «bruremars», vart fire par laurdag vigde på den ikoniske turistattraksjonen med utsikt over Ringedalsvatnet i Ullensvang.

– Det var venta vind, regn og ruskete vêr, men det var aldri aktuelt å utsetja bryllaupa. Og vêret vart mykje betre. Stemninga var magisk og bryllaupa på sjølve Trolltunga spektakulære, skriv kommunen i ei pressemelding.

Sarah Melkeraaen tonesette vigslane, som i tur og orden vart utførte av ordførar Roald Aga Haug. Aller fyrst ut var danske Tinna Bundgaard Frentz og Kasper Sørensen.

Etterpå vart det servert hardangersider og ymse lokalmat, før dei nygifte returnerte til song og saksofontonar frå musikaren, opplyser kommunen.

Trolltunga Active gaida dei vordande ektefolka til Trolltunga.

Om alle ekteskapa overlevde heimturen, eller om nokon enda opp med eit troll til kjerring – ja, det seier eventyret og kommunen ingenting om.