Ferieparadis i nabolaget

Fleire planlegg ferieturar denne sommaren samanlikna med fjoråret. Mange kjem til å reise utanlands, og fleire enn i fjor vil òg reise rundt i Noreg. Likevel er det ikkje sikkert du må bevege seg langt vekk frå ditt eige nabolag for å få fine ferieopplevingar.

Ta ferie!

Ifølgje tal frå Statistisk sentralbyrå (SSB) har mellom ni og ti prosent av nordmenn droppa ferietur om sommaren dei siste åra. Det betyr ikkje at ein treng å kjede seg:

– Eg trur det å feriere i nærmiljøet kan vere utruleg godt for oss. Det gir ei ro i sjela og lærer oss å setje meir pris på alt vi har rundt oss i kvardagen. I tillegg er det veldig fint å støtte opp om lokalt næringsliv. Det er ofte eldsjeler som står bak dei lokale initiativa og opplevingane. Dei kronene du brukar på ein vaffel på bygdetunet i nærleiken, betyr mykje for dei som driv det. Dessutan kan du kutte betrakteleg ned på klimagassutsleppa ved å unngå å fly, seier Ingrid Næss-Holm, konstituert leiar i Framtiden i våre hender, til Nynorsk pressekontor.

Ho understrekar at du ikkje treng å ha kvardag – sjølv om du er heime i ferien.

– Det første tipset mitt er å faktisk gjere alle dei tinga du skulle ønskje du hadde tid til i kvardagen: lese den boka, utforske ei ny bakeoppskrift, strikke, berre sitte på verandaen og kike ut i hagen. Og for all del, ta ferie frå alle praktiske gjeremål og alt som skulle vore gjort, seier ho.

Utforsk nærmiljøet

Næss-Holm meiner dei gode sommarminna kan skapast like utanfor eiga utgangsdør.

– Berre det å telte i hagen eller sove ei natt på balkongen kan bli gode opplevingar viss du gjer litt ut av det. Om du vil gjere det hakket meir avansert, kan du sjekke om det finst DNT-hytter i nærleiken, seier ho.

Den Norske Turistforening (DNT) har hytter i store delar av landet og oppfordrar dei som er heime i ferien, til å utforske nærmiljøet.

– Uansett om du bur i by eller ute i distriktet, så finst det mange fantastiske nærturar. Det viktigaste er å ikkje overtenkje det å gå på tur. Finn ein tur du har lyst til å gå, sjekk vêrmeldinga og kle deg deretter, og legg i veg. Ta gjerne med deg matpakke og ein termos med kaffi, då blir turen ekstra fin, seier rådgivar for nærturar i DNT, Maren Mjelstad.

I naturen kan òg dei spektakulære opplevingane liggje rett framfor nasen på deg. Mjelstad oppmodar til å omfamne naturopplevingane.

– Ein seier ofte at ein bør løfte blikket for å få med seg alt, men i naturen kan det vere like magisk å rette blikket mot dei små tinga. Å sjå korleis mauren i maurtuene jobbar for fullt, gleda når du sigrar i borkebåtløpet eller når fisken bit på i regnet, dette kan vere opplevingar ein aldri gløymer, seier ho.

Turist i eiga bygd

I tillegg er det truleg fleire av oss som ikkje oppsøkjer typiske turistaktivitetar på vår eigen heimplass. Heimeferie kan vere eit godt høve til å prøve lokale tilbod du elles ikkje nyttar deg av.

– Tenk på kva du ville ha tipsa ein turist om, og sjekk kva informasjon kommunen har om arrangement og tilbod i sommar. Set deg på ein fortauskafé, og sjå på folk som går forbi. Vi blir ofte blinde for det vi har rundt oss til dagleg – medan turistane flokkar seg dit, rår Næss-Holm i Framtiden i våre hender