Professor vann kulturprisen

Det vart gjort kjent i starten av kommunestyremøtet i rådhuset i Odda onsdag 18. mars.

Leiar Marit Jensen Måkestad (Ap) offentleggjorde vinnaren frå Odda, som er plukka ut av utval for kultur og levekår. Det kom ni nominasjonar om åtte kandidatar innan fristen. 

Grunngjevinga for tildelinga er slik:

– Reidar Borgstrøm har som vitskapsmann vore oppteken av å dela fagkompetansen sin både med ålmenta, med fagkollegaer og med styresmakter. Engasjementet hans i det offentlege rommet er stort. Ikkje minst gjeld dette Hardangervidda. Her er han fyrst og fremst oppteken av fisk, villrein og bruken av vidda. Borgstrøm kjenner Hardangervidda svært godt både som forskar og som aktiv brukar. Mange i Indre Hardanger har òg fått god hjelp til og rettleiing om korleis dei skal ta vare på fiskevatn. Dei to siste åra har Reidar Borgstrøm skrive to bøker som begge vil verta ståande som framifrå kulturhistoriske verk for Indre Hardanger. Bøkene er «Stølar og buer i Kvenne-, Veig- og Kinsevassdraga» (2024) og «Stølar i Odda, frå Rebjørg og Skjeldesete i nord til Seljestad i sør» (2025). Dei er eit særs verdfullt tilskot til lokalsoga som det er vanskeleg å verdsetja høgt nok. Folk i Indre Hardanger kan vera særs takksame for at Reidar Borgstrøm har brukt kompetansen, lokalkunnskapen, engasjementet, interessa og språkdugleiken sin til å realisera dette store arbeidet. I den fyrste boka var Johannes H. Sekse medforfattar, og i den andre boka samarbeidde han med Harald Jordal. I arbeidet med dei to bøkene har han hatt kontakt med nærast tallause personar, samla bilete, studert kjelder og lese faglitteratur. I det heile har Reidar Borgstrøm lagt ned eit formidabelt kulturminnearbeid som involverer mange, som er relevant for mange og som skapar identitet og engasjement på tvers av generasjonar.

Kulturprisen er eit diplom, 25 000 kroner og ein skulptur laga av kunstnaren Ingunn Van Etten.