Borgarleg skred i skulevalet

I Kvam gjorde høvesvis Frp og KrF det best på Kvam vidaregåande skule og Framnes Kristne Vidaregåande Skule.

Frp sanka 33,5 prosent av røystene på den offentlege skulen i Øystese og Norheimsund. Framgangen sidan sist er på solide 22,8 prosentpoeng. Nest størst vart H, som fekk 22,8 prosent. Ap fekk 12,6 prosent og den store taparen samanlikna med 2021.

167 gyldige røyster vart registrerte. 7 var blanke røyster.

På privatskulen Framnes i Vikøy er det slett ikkje noko nytt med gul valsiger, men KrF dobla oppslutninga sidan 2021 og fekk heile 67,2 prosent av røystene. Også på dei neste plassane fylgde borgarlege parti – Frp med 8,0 og H med 7,2 prosent av røystene.

250 gyldige røyster, av dei 8 blanke, vart loggførte. 168 av røystene gjekk til KrF. På landsbasis fekk partiet 3,2 prosent av røystene, som er ein auke frå valet i 2021.

På Odda vidaregåande skule vart Frp størst, med 31,1 prosent av røystene og ein auke på 11,8 prosentpoeng frå 2021-resultatet. Her gjorde Sp det skarpt og vart nest størst. Partiet fekk 18,7 prosent av røystene.

Frp og H gjekk fram med høvesvis 12 og 6 prosentpoeng på landsbasis. Frp dobla nesten oppslutninga si frå 13,9 i 2021 til heile 26 prosent i år.

– Det er betre enn eg torde å drøyma om, seier FpU-leiar Simen Velle til NRK.

H fekk nest høgast oppslutning med 19,7 prosent av stemmene, også det ein stor framgang på 6,1 prosentpoeng frå 2021. På raudgrøn side mista alle parti oppslutning. Blant dei raudgrøne blei Arbeidarpartiet som venta størst, med 17,1 prosent oppslutning, men opplevde ein markant nedgang på 6,3 prosentpoeng.

Du finn resultata frå skulevalet på nettsida https://skolevalg.sikt.no/.