Årets kjøt kjem frå Homlagarden

Heil kylling frå Økodrift Homlagarden AS på Aksnes er kåra til kategorivinnar av Årets kjøt i matkonkurransen Det norske måltid (DNM).

– Vinnaren har ein innbydande utsjånad og frisk lukt, skriv domarane.

– Forbrukarane ser heile produktet, og merkevara er tydeleg på etiketten. Kjøtet er mørt og saftig i munnen. Domarane meiner at smaken på produktet er finstemt og rein. Produsenten er kjend for å tenkja nytt kring kjøtproduksjon i Noreg, og med årets vinnarprodukt kan ein konstatera at desse vala har bore frukt. Vinnaren er odla fram med omhug, skriv DNM på nettsida si.

Dei 12 beste matprodukta og råvarene er kåra av juryane i DNM. Homlagarden vart kåra under Matstreif i Oslo i september. Finalen i sesong 11 vart halden på Clarion Hotel Energy i Stavanger 11. januar.

Dei erfarne domarane vurderer med eitt sams mål – kvalitet. I årets tevling har seks uavhengige fagjuryar smakt seg fram til finalistane i Stavanger, Seljord, Oslo, Trondheim, Tromsø og Bergen.

– Det er ei stor glede å følgja desse suksesshistoriene. Me ynskjer at folk flest tek meir medvitne val når dei handlar mat, både til kvardag og fest, og heldigvis ser me ei positiv utvikling i forbrukarmønsteret, seier leiar i DNM, Kristin Austigard.

DNM skal lyfta norske mat- og drikkeprodusentar og vera ein pådrivar for norsk, mangfaldig og berekraftig matproduksjon. På 11 år er meir enn 1.200 produkt vurderte av jurymedlemene.

DNM gjennomførte i 2018 fem delfinalar og éi finalejuryering. Resultatet av dette var 36 finalistar fordelte på 12 kategoriar, altså 3 finalistar i kvar konkurransekategori.

Håkon Norheimnorheim@hf.no