Ny siger for Norheimsund skulemusikklag

Dei raudkledde musikantane frå Norheimsund har vore på farten att, og gjorde ikkje skam på bygda si denne gongen heller. På Mangerfestivalen, ei stormønstring av korps frå heile Hordaland, var dei med og tevla igjen. Konkurransen var hard i vår divisjon, – men sjå om våre musikantar ikkje greidde det nok ein gong: tok heim den store pokalen. Med knappast mogeleg margin vart sigeren hala i land. Foreldra sat i salen med blanke augo og fylgde premieutdelinga. Me stiller oss i rekkja av gratulantar!

Ikkje berre var hovudkorpset med, også juniorkorpset og aspirantane til Norheimsund skulemusikklag var med på Mangerfestivalen. I desse klassane er det ingen konkurranse, – men dei spela så det var ein fryd å høyra.

Korps handlar om å byggja stein på stein over tid. Takk til alle gode krefter som nett no reiser eit vakkert byggverk omkring Norheimsund skulemusikklag.

For foreldra

Olav Skeie Lid