Kva meiner ordføraren eigentleg?

«Skal det leggjast fram som at ein satsar på Ålvik når det som skjedde, eigentleg berre var at heradet valde den lettaste utvegen for å bøta på sine eigne forsømingssynder?» spør Liv Turid Lofthus.

Herr ordførar, takk for at du svara så raskt. Men, eg er visst litt «tett», for no har eg lese svaret ditt fleire gonger, og eg skjønar framleis ikkje korleis «makta» i Kvam tenkjer når det gjeld Ålvik.

Er det slik at me her inne skal vera glade og takksame overfor heradet for at me har ein tenleg skule og barnehage, og at me har hatt basseng fram til no?

Barnehagen fekk Kvam herad lagd opp i hendene av Ålvik sanitetslag i si tid, og seinare har heradet forsømt vedlikehald og opprusting såpass at det til slutt måtte gjera drastiske tiltak. Skulen blei om mogeleg endå meir forsømt, så til slutt var inneklimaet rett og slett helsefarleg. Statlege styresmakter presiserte at arbeidsmiljølova også gjeld for skuleelevar, og Arbeidstilsynet byrja «å bry seg». Då måtte Kvam herad gjera noko, ein kan seia at det fekk kniven på strupen. Heradet valde då å smokka opp ein stygg og billeg brakkerigg i staden for å risikera endå ein opprivande og pinleg skulekamp for så å skyssa seksåringar 40 minuttar kvar veg på ein dårleg og rasfarleg veg. Er det meininga at me skal vera takksame og ropa amen og halleluja for at ikkje barnehage- og skulebarna må reisa på den nemnde dårlege vegen kvar dag? Skal det leggjast fram som at ein satsar på Ålvik når det som skjedde, eigentleg berre var at heradet valde den lettaste utvegen for å bøta på sine eigne forsømingssynder?

Og vegen: Kva gjer Kvam herad eigentleg i høve til fylket for å få ein betre og sikrare veg? Kor mykje gnål og press bryr ein seg med på Ålvik sine vegner? Og dei som styrer og steller med Kvammapakken (og sannsynlegvis tener både pengar og prestisje på dei jobbane), korleis kunne dei sleppa så lett unna med å bruka opp alle pengane i «sentrale strok» slik at sekken var tom før Ålvik fekk ei einaste krone? Kan det vera slik ein del av oss trur, at det ikkje blir rekna som å vera så nøye når det berre er folk med tilknyting til Ålvik som opplever at det dett isklumpar og/eller steinar ned i Steinstøberget nesten kvar dag om vinteren og våren, at det finst stader der folk ikkje kan gå fordi det ikkje er mogeleg for fotgjengarar og bilar å vera der samtidig («Bostippen» og Midttun – Kjepsohøgda), at det finst stader der det ikkje berre er hol i asfalten, men hol rett gjennom heile vegen så ein ser gjennom han? Og kva signal gjev det til fylket at heradet gjer så lite ut av vanstyret i Kvammapakken?

Skal me vera glade og takksame for at me har bomstasjon på Kjepso slik at me betaler når me reiser til/frå Voss og såleis stikk i strid med St.prp. 77 finansierer veg ein heilt annan stad i kommunen?

Ja, me i Ålvik har kanskje sove i timen, me har kanskje vore dumme og sløve, men det kan òg henda at det som har skjedd er at me har kjent oss makteslause og ikkje har trudd at det gjekk an å gjera noko. Som kjent er det makta som rår.

Men no har ein heil del av oss vakna og kjenner at nok er nok. Me har fått nok av å bli tilsidesette og oversette. Me er leie av å bli styrte av folk som ikkje ser ut til å skjøna at dei er sette til å styra og stella med heile kommunen, ikkje berre Norheimsund (og litt Øystese om dei protesterer hardt nok).

Så kan me gjerne få svar som er meint å overtyda oss om at heradet har satsa på Ålvik. Me trur ikkje på dykk!

Med vennleg, men irritert helsing,

Liv Turid Lofthus