Helle gjev ut bok

Bakeboka til Helle Berg Leiren kjem ut i september. Samlaget tok kontakt med 13-åringen i vinter og spurde om ho ville skriva ei bok med oppskrifter og baketips.

Helle har fått mykje merksemd, særleg blant dei unge, etter sigeren i tv-programmet.

Samlaget håpar at boka kan inspirera framtidige hobbybakarar i alle heimar, seier Merete Pharo, sals- og marknadskonsulent for barne- og ungdomsbøker hjå Det Norske Samlaget (DNS).

– Boka er meint som eit utgangspunkt for dei som ynskjer å læra meir om baking, seier Helle. 

Meir enn oppskrifter

Boka inneheld eit breitt utval av favorittoppskriftene hennar. Mellom anna oppskrifter på kaker, cupcakar, bollar og rundstykke, seier Helle. Nokre er hennar eigne, andre kjem frå familie og folk ho kjenner. Ifylgje Pharo har boka også oppskrifter frå «Bakemesterskapet junior».

I tillegg er det eigne sider som viser teknikkar. Til dømes kan ein læra å knyta bollar og sprøyta krem på cupcakar, seier Helle.

Tipsa og triksa ho deler i boka, kjem mellom anna frå besteforeldra hennar og frå eigne erfaringar på kjøkenet.

Boka inneheld eit personleg føreord der ho fortel om opplevinga si av tv-programmet og kva som fekk henne til å baka. Du kan også lesa om andre interesser Helle har, for å visa at ho er eit heilt vanleg barn, fortel Pharo. 

For å illustrera boka har Helle vore med på ein fotoseanse i Bergen. Fotografen kom også heim til henne for å ta bilete. Boka inneheld bilete frå tv-tevlinga og private bilete frå oppveksten, seier Helle.

Rask bokprosess

DNS er eit kultur- og kunnskapsforlag som jobbar med å fremja nynorsk språk og litteratur. Samlaget lét seg imponera av bakegleda til Helle og innsatsen hennar i programmet. Sidan Helle er nynorskbrukar, passa det dessutan godt å lyfta henne fram, seier Pharo.

Arbeidet med boka har gått i rekordfart, ifylgje Pharo. Vanlegvis tek det lengre tid å laga ei bok der oppskrifter må sjekkast og testast. Pharo seier at DNS aldri har laga ei bok så raskt. Årsaka er at redaktøren og forfattaren vart så engasjerte, seier ho.

Eline Krøvel er redaktør og Ragnhild Marie Kjosbakken er forfattar av boka. Kjosbakken har jobba med Helle, snakka med henne og teke seg av rettskrivinga i boka.

Oppskriftene er kvalitetstesta av Krøvel. Dei andre kontormedarbeidarane vart veldig glade då ho kom med masse bakst, seier Pharo.

Ho fortel at det som skil boka frå andre bakebøker for born og unge, er at det er eit barn som er avsendaren. Ho seier at Helle ikkje berre er ein ung bakar, men kjend for born og unge over heile landet som vinnaren av eit populært program på NRK.

– Det er meir unikt når unge sjølve skriv, seier Pharo. 

For born og vaksne

DNS ynskjer at alle skal få stor glede av oppskriftene. Dei er leselege og forståelege nok til at sjølv den yngste og mest uerfarne bakaren skal klara det, seier Pharo. Oppskriftene er merkte som lette, middels vanskelege og vanskelege. 

DNS håpar dette kan verta årets julegåve til framtidige hobbybakarar. Kanskje vil fleire bli inspirerte og melda seg på tv-programmet, seier Pharo. Boka eignar seg for både vaksne og born, og kan gjerne innby til tid saman.

Den unge bakaren ynskjer å halda fleire bakekurs og ta fleire oppdrag i tida som kjem, mellom anna i samband med bokutgjevinga. Målet er å laga ein karriere av bakinga.

På lang sikt er den store draumen å opna eige bakeri, seier Helle.