Biletserie: Kakaokonsert i Kabuso

Kjolar og finskjorter. Nervøsitet og spaning. Utløysing og lette. Kakaokonsertane gjev unge kulturtalent ein smakebit av kva som ventar.

– Det er kamp om plassane. Dei fleste har lyst til å vera med på kakaokonsertane. Dei må kunna det dei skal spela eller syngja, best mogeleg, fortel kulturskulelærar Inger Dysvik.

Laurdag fekk 14 elevar sjansen til å visa kva dei kan. Mange av dei song, men også gitar, fiolin, flygel, ukulele og kornett vart trakterte i Kunsthuset Kabuso i Øystese. Nokre av elevane framførte fleire nummer då dei fyrst var i sving, så i alt baud den timelange konserten på bortimot tjue ulike innslag.

Dysvik seier at ettersom så mange elevar syng, medan langt færre spelar noko instrument, vert det gjerne slik at songelevane vert litt statistisk underrepresenterte på konsertane. Vona lever likevel om at dei kan få vera med neste gong.

– Elevane veks av dette. Eg oppfattar ikkje at dei er spesielt opptekne av å vera best, men dei har det kjekt i lag og trivst med å sitja på fyrste rad og snakka saman. Det er stas å vera i Kabuso med god scene og lyd, seier Dysvik.

HF talde ikkje, men seteradene var godt oppfylte, for det meste av foreldre og annan familie. Slekta reiser i somme tilfelle eit godt stykke for å få vera med på hendinga, fortel Dysvik. Mange av borna kasta nokre tydelege, lange blikk mot foreldre, sysken og besteforeldre, kanskje i lengt etter trøyst, oppmuntring eller tryggleik, medan dei framførte.

Konferansier var pianist og kulturskulelærar Geir Botnen, som sjølv avrunda konserten som akkompagnatør til Esmee van der Linden. 8. desember er neste kakaokonsert i Kabuso. Namnet lyg ikkje – det vert servert kakao i kafeen.